LAKRIMO

Lakrimo de amo
diven sango diven vino pose vinagro
e pose vaporekfluginta
lasas sua malgrea signo
sempre restonta
en la glasi viva ek kristalo
til la tempo en qua
la tempo
ruptabos li a mil peci
polva.

Tiberio Madonna

ITALIANA
ESPERANTO

MEA NOKTO

E kande ca nokto dil mondo
falos adsule exhaustita
blindigita
da la lumi dil respiri profunda
e dil manui
qui intertushas sen pavoro
mea nokto
duros embracar me
kun la forteso di polpego
del obskureso dil abisi profunda.

Sen ula fino.

Akrochit a la parieto di mea kordio
kun la kadro azuroza
la memoro di mea jorno
qua nultempe plus retrovenos.

Tiberio Madonna

ESPERANTO
ITALIANA

ADSUR LA TRAGEDIO

La suno
lumas adsur la tragedio
e me frapus ol per pugno
igante lu forkurar
e rikochar
sur la muri dil teatro di marioneti
por pose falar
sur la fundo blua neta
e truizar la vesto dil destino.
Tra la truo
brulfacita
quaze ita da sigareto
aparus hororiganta
omna sorto di insekti
vermi e paraziti
montranta al mondo astonata
la hororo e la shamo
dil senkompat intrigo
texata sur la mizeroza ragi
di ni.
E ta suno
de la fora chambreto
ne tardigus fairizar
la tota vesto
brilanta ek satino blua
e de to
omno esus incendio.
Kontree
obstinant e ferma
ol
lumas adsur la tragedio.

Tiberio Madonna

ESPERANTO
ITALIANA